इमानसिंह राइ
हेन्खामा आन्कान म़नाओ आन्मा
केन लुसा पोयिन चिन्तिन्चिन हान्मा
ओदाङा च़न्येन य़न्पा कि ठाङ्मा
वाखाछा लिसिन झाराक आन्कान्ङा ।
ह़ङिन च़ङिन ठ़ङिन युङिन ओदाङा
सोम तुक्मादोत अ़छाआसा आन्मा
हिप्सा ढोक्सा मलिसा लित्खा पाखा
हेन्खामाङा चामा स़ङ्सि सिखाचाखा ।
आन सोम तुक आन हेन्खामा भुङ्लो
आन कोङ तुक निम़ना ओदा युङ्लो
आन्कान अछाचि युङिन अबोक्छोङ्दा
हेन्खामा बाखाआ मकुप्याङ लोक्छुम्वा ।
वाताओ बेन हेन्खामा वाहोम्सुङो
नाम बान्ओ लेन अक्चिचित छोम्सुङो
ठोङ–ठोङदा ताम्वाआ नुलोक ताप्तुङो
होन–होनदा याङ्वाआ भेप्तुङो ।
हेन्खामा आसा मामावा मकेन्याङ
दिदि हान्तुम चेप्तुमओ मएन्याङ
ओदाङा मपुक्टा ओदाङा पोयिन खारिन
स़न्दान्कि छाङ ओदाङा होलिन खारिन ।
आमचोक– ३, थिदिङ्खा, भोजपुर
बुङ्वाखा, इखिप १८४ दाङ्का
