अलक बहादुर सोङ्मेन
मना देचन थाङिन, कामाकाचि मुन । आन काचि मुसा खारिन्हेदा साङ्छे मनाङे । मना लिसिन्कि काचि मुन्हिदा मनाआ मुमापा काचि मनाआ मुन । छोवाका मुमा खान्नु । ओदा हान होत्नि याक्याङ सायाकाम्मा, छेवारा निओ ताङ खोमा लेन अनुवाक लेन दोङ खाङ्माकि काचि मुन्नालो नुलोक्ङे लिसिन निकिना लेन (साइत) खाङ्माछे युङ्नि माआङ ।
खिमरङ साइता, बोयोम खसि मुमा, भाक खसि मुमा, माङ्खलाम कोन्मा, छानङ लोन्मा, खाक्को रासि लिसा मोदा नङ्लोन्मा कि लादिप्मा चोप्मादोत । लेन खाङ्मा निओ लादिप्मा भगरादाका सावाभुङ युङ । खोन्ओसाआ, फेक कातात लादिप्माचि मयाकहिदा होवातात खान । अत्ओचि, होवातात खान्नुओचि मयाक्हिदा, हारादिमा कि ओम्पे खान अनुचिओ । हालापाक्मा कि माक्याङ्ओ होवातात खान अनुचिन नि मयङ ।
मोको झारादाङ्का खान्नुओ तात हारादिमा दात । मोका हारादिमा अरन्मिन्लो ओम्पेतात परा मुमादोत । हालापाक्मा कि माकाचक्मा मुम्लो हालापाक्मादा खिमा, म्हुमा लि । माकाचक्मादा सखाला बान निकि देम चाकालेक्वाचिओ अचु लेमादाङा युङिन । खोन्ओसा आन्कान्छा लेन खाङ्मा चिन्तिन्चिन्ने । आन्कान किरावाछे मनाङे । चिन्तिन्चिन्लो लेसिन । अलेनङ नि यङिन्लोना अलेसिमिन्ङे ।
खोन्ओसाआ अनुवाक, खान्नुओ थोका खादाओ लामदककुदक खोदा अयुङ्निन । लेमा, सिन्मा, ताया निओ छा दित्छा बद्ढेङा मिन्मा खोदा ढिरुम । माआङ्नालो खादा खोदा आन्ताकाहोवा हान्मा निओना साङा अलेसुन कि माआङ ।
लेसुम्योमओ दुम झारा आन्कान किरावा किरावादा कोङ्सेङ नि खाङ मेत्कामेत मुमादोत । अलेसिमिन्येन लेमा सावा मुन्येनहिदा लाजा मेत्मान्मु खाङ्मेत मुमादोत । आन्कान हालेन्दाङा लेसिनकि चात्लो रङ्रि मुमा अलिनिन । अङ्का यङ्साङा मुङाङा, अङ्काना लेङाङा नि मिन्मा खिसि मुमा अनुनिन ।
ओदा साइत नि सायाकाम्मा, ताङ खोमा, खिम्दा वाङ्मा, बान खाङ्मा, माङ्ख कोन्मा आ-आप्पि युङ्हेदा सायाकाम्मा साइतदा ताङ खोमा खिमदा वाङ्मादा ताङ खोमा साइतछे साङ्साङ्चिना मखाओ । मोको मोहात्नि अनुनिन । निमना सोसे मुम्लो आप्पिङा सोसे लिसिन । लेसुम्योमओ काचि नुलोक खान्नुलोङा मुमादोत । मेत्प़ छा मुमादोत ।
बुङ्वाखा ११७ दाङ्का
